Amazon
kompaniyasi kuni kecha Kindle qurilmalari egalari uchun
o‘zining "virtual kutubxona”sini ishga tushirdi. Bu haqda
"Lenta.ru” internet-nashri xabar qilgan.
Endilikda Kindle bukriderlari va Kindle Fire planshet kompyuterlari
egalari ushbu virtual kutubxonadan oyiga bitta kitobni bepul olib,
o‘qishlari mumkin. Biroq, bir paytning o‘zida virtual kutubxonadan faqat
bitta kitobni olish mumkin xolos, ikkinchi kitobni olish uchun
avvalgisini "qaytarish” lozim. Bu xuddi odatiy kutubxonalarga o‘xshab
ishlaydi.
Ushbu xizmatdan faqatgina "Amazon Prime” premium-akkaunt egalari
foydalanishlari mumkin. Ushbu xizmatga ulanish uchun yiliga 79 dollar
to‘lash lozim. Premium-akkaunt egalari mazkur virtual kutubxonadan
tashqari yana boshqa maxsus xizmatlardan ham foydalanishlari mumkin.
Masalan, ular Amazon onlayn-do‘konidan xarid qilishsa, tovar ikki kun
ichida bepul yetkazib beriladi. Ular yana Amazon arxividagi 10 mingdan
ortiq filmlarni va turli teleko‘rsatuvlarni bepul tomosha qilishlari ham
mumkin.
Kindle qurilmalari egalari uchun virtual kutubxona
Foto: Amazon
Hozirda Amazon internet-do‘konining bazasida 30 milliondan ortiq
kitob mavjud. Xabar qilinishicha, virtual kutubxonaga 5 mingga yaqin
elektron kitob qo‘yiladi. Ular ichida 100 dan ortig‘i albatta "The New
York Times Book Review” ro‘yxatiga kirgan bestsellerlar bo‘ladi.
| 
