Qayta tiklanuvchi beton

Amerikalik olimlar elastik beton yaratdi, deb xabar beradi RATA-TASS. Ma’lumotlarga qaraganda, qurilish olamida yangilik bo‘lgan ushbu beton imorat darz ketganida to‘la tiklanish xususiyatiga ega. Buning uchun yoriqqa suv quyishning o‘zi kifoya. Shunda betondagi mineral birikmalar havodagi karbonat angidrid gazi bilan birikib, yoriqlar o‘rnini to‘ldiruvchi kalsiy karbonati ishlab chiqaradi.

Mahalliy matbuotning yozishicha, elastik beton chig‘anoqlarni rivojlantiradigan minerallar birikmasidan tayyorlanadi. Mutaxassislarning ta’kidlashicha, undan yo‘llar, ko‘priklar va zilzilaga chidamli ko‘p qavatli inshootlar barpo etishda foydalanish mumkin.

15 million dollarlik olmos

Janubiy Afrika Respublikasida og‘irligi 522 karatga teng olmos topildi. Ushbu olmos kattaligi bo‘yicha dunyoda o‘n to‘qqizinchi o‘rinni egalladi. Ommaviy axborot vositalari tarqatgan xabarlarga ko‘ra, mazkur olmos o‘n besh million AQSh dollariga baholangan.

Ma’lumot o‘rnida shuni aytish joizki, shunga o‘xshash topilma Janubiy Afrikada 1905-yilda aniqlangan. Uning og‘irligi 3106 karatga teng bo‘lib, dunyodagi eng katta olmoslar sirasiga kiradi.

Mobil telefondan foydalangach, qo‘lingizni yuvishni unutmang

Fransiya olimlari mobil telefonlar inson salomatligi uchun zararli ekanini ta’kidlamoqda. Uyali telefon ustidagi qoplamada ko‘plab turdagi bakteriyalar mavjud bo‘lib, turli yuqumli xastaliklarni keltirib chiqaradi.