Яқин орада мамлакатимизда янги UzAuto Trailer заводини ишга тушириш режалаштирилган. Бу эса Ўзбекистонда бутундунёга машҳур MAN юк техникасини ишлаб чиқариш лойиҳасининг учинчи босқичи ҳисобланади.

12uz.com ахборот порталининг USSO Design реклама агентлигига таяниб хабар беришича, UzAuto Trailer осма ва тиркама техника ишлаб чиқариш, самосвал кузов ва яримприцеплар, контейнерташувчи, автоташувчи, чодирли, изотермик яримприцеп ва бошқа махсус техника ишлаб чиқариш билан шуғулланади. Ҳозирда янги завод биносининг ташқи ва ички томонига сўнгги безак бериш ишлари олиб борилмоқда.

Аввал хабар берилганидек, JV MAN Auto-Uzbekistan қўшма корхонаси 2009 йилнинг 29 августида ташкил топган бўлиб, унинг муассислари «Ўзавтосаноат» (51%) ва MAN Truck & Bus AG (49%) ҳисобланади. Ўтган йилнинг июл ойида «JV MAN Auto-Uzbekistan» ҚК MAN йирик габаритли юк автотранспорти заводининг очилиш маросими бўлиб ўтган эди. Завод қурилишининг илк босқичида йилига 5000 та шатакчи ва шассиларни йиғиш ва бўяш, шунингдек ташхислайдиган участка, дилерлик ва хизмат кўрсатиш марказларини ишга тушириш кўзда тутилган эди.

Кейинчалик янги қурилиш мажмуасида ром ташувчи юк машиналарининг кабиналарини ишлаб чиқариш кўзда тутилган. Узоқ муддатли истиқболли режада йилига 20 мингта маҳсулот ишлаб чиқариш режалаштирилмоқда. Ўтган йилнинг 9 ойи давомида корхона цехларидан 653 юк машиналари чиққан. «JV MAN AUTO-Uzbekistan» реклама ва маркетинг бўйича бош менежери Алишер Алиқуловнинг айтишича, ҳозирда корхона Туркманистон, Афғонистон, Қозоғистон, Озарбойжон ва Россияга махсус машина етказишни йўлга қўйган. Ҳозирда корхона йилига уч мингтагача автомобил ишлаб чиқармоқда.