Халқаро Гэллап тадқиқот маркази ҳар йили турли мамлакатларда ўтказиладиган сўров натижаларини нашр этди. Сўров мавзуси аҳолининг ўзини қай даражада бахтиёр ҳис қилишига бағишланган.

Марказ томонидан ўтказилган сўровда дунёнинг 58 та мамлакатидан 45 минг киши қатнашди. Айтиш жоизки, дунёда иқтисодий пессимизм ҳукмрон бўлишига қарамасдан, Ер аҳолисининг кўпчилиги (53%) ўзини бахтиёр ҳис қилар экан, бахтиёрлар сони бахтсизларникига қараганда тўрт баравар кўп бўлиб чиқди.

58 та мамлакат ичида Ўзбекистон бахтиёрлик даражаси бўйича тузилган рейтингда 13 ўринни эгаллади. Бу ерда бахтиёрлик индекси 62% ни ташкил этди.

Тадқиқот натижаларига кўра, сайёрамиздаги энг бахтиёр мамалкат Фиджи бўлиб чиқди. Шунингдек бахтиёрлар бешталигидан Нигерия, Нидерландия, Швейцария ва Гана мамлакатлари ҳам ўрин олди.

Бахтиёрлик ҳолати — бу у ёки бу мамлакатнинг ўзига хос маданий хусусиятидир, дея хулоса қилишмоқда тадқиқотчилар. У мамлакатнинг реал иқтисодий аҳволи ва у билан боғлиқ умидларга бевосита боғлиқ эмас.

Тадқиқотчилар сўровда қатнашган мамлакатларнинг сезиларли қисмини "бахтиёр пессимистлар” блокига киритди, унда пессимизмнинг юқори даражаси бахтиёрликнинг юқори даражаси билан биргаликда келади. Унга асосан Европа мамлакатлари кирди: Финляндия, Швейцария, Германия, Исландия, Нидерландия, Испания, Австрия, Бельгия, Франция ҳамда Жанубий Корея ва Япония. 

Тадқиқотчилар одамларни айнан нима бахтиёр қилишини аниқ айтиб бериш қийинлигини қайд этишади, аммо глобал сўров бир нечта қизиқарли хулосаларни чиқариш имконини берди.

Бахтни пулларнинг ўзи эмас, балки инсоннинг ўзи яшайдиган жамиятда эгаллаган нисбатан юқори ижтимоий-иқтисодий мақоми келтирар экан. Сўровга кўра, ижтимоий-иқтисодий поғона чўққисида бўлганлар орасида бахтиёр кишилар икки бараварга кўплиги маълум бўлди, пастроқ поғонадагилар эса, улар бой ёки қашшоқ мамлакатда яшашидан қатъи назар, унчалик бахтиёр эмаслиги аниқланди.

Ўрта ёш – бахт учун яхши давр эмас. Хусусан, 51-65 ёшга (33%) етганларда бахтиёрлик индекси ўттизга кирмаганлар (44%) ва 65 ёшдан катта бўлган кекса ёшдагилар (43%) билан таққослаганда паст эканлиги кузатилган.

Шунингдек, бутун дунё бўйлаб ишсизлар ва пенсионерлар орасида ҳам бахтиёрлик индексининг паст даражаси маълум бўлди.