2012 йил январь ойи давомида UZ зонасидаги фаол доменлар сони 1,7 фоизга ошиб, 1 февраль ҳолатига кўра 13674 тани ташкил этди. UZINFOCOM Компьютер ва ахборот технологияларини ривожлантириш ва жорий этиш марказининг статистика ҳисоботида ана шу рақамлар келтирилади.

Хостингдан фойдаланувчи фаол доменлар сони ҳам ошиб, у 9837 ни ташкил қилди. Ушбу кўрсаткич ой давомида 1,5% ўсишни кўрсатди.

Ўзининг расмий интернет-порталига эга давлат муассасаларининг сони ҳам ортиб бормоқда. Бугунги кунда уларнинг сони 114 тани ташкил этади. 

2005 йил сентябрида ўқув-таълим, илмий, ёшлар ва болалар муассасалари ва ташкилотлари учун ахборот материаллари ва захираларини тўплаш мақсадида яратилган ZiyоNET кутубхона-маълумот миллий тизимида айни пайтда 34407 та материал мавжуд. Январь ойида уларнинг сони 11,2 фоизга ошган, дея хабар беради "Правда Востока” газетаси "Туркистон-пресс” НАА га таянган ҳолда. 

www.uz Миллий ахборот-қидирув тизими Интернет тармоғининг миллий сегментидаги ахборотга тез уланиш механизми ҳисобланади. www.uz сервисларига каталог, топ-рейтинг, умумий статистика, янгиликлар киради.