"Ucell":
биз абонентлар учун минимал тўлов шартларини жорий этмаганмиз
·
"Ucell"
савдо белгиси остида мобил алоқа хизматларини таклиф этувчи "Coscom"
ХК МЧЖ берган хабарга кўра, компания ўз абонентлари учун ҳисобни тўлдириш
бўйича минимал миқдорни белгиламаган.
Компания абонентларининг сўзларига кўра, "Paynet" тўлов пунктларининг
ходимлари улардан ҳисобни тўлдириш учун камида 3 минг сўм пул талаб қиляпти.
Корпоратив алоқалар бўйича департамент раҳбари Даврон Азизовнинг билдиришича,
"Ucell" абонентларнинг ҳисобини тўлдириш учун минимал пул миқдори
шартларини жорий этмаган.
"Ucell" абонентлари ўз ҳисобларини олдингидай исталган суммага
тўлдиришлари мумкин, - дея қайд этади Даврон Азизов. – Компаниямиз
абонентлардан тушаётган баъзи бир тўлов пунктлари ходимларининг асоссиз
талаблари ҳақидаги сигналларига тезкор равишда чора кўрган ҳолда, тез орада
"Paynet" билан ушбу вазиятни ҳал этишга ҳаракат қилади. Биз
мижозларимизга "Ucell" компанияси ушбу талабларга ҳеч қандай алоқаси
йўқлиги тўғрисидаги расмий хабарномани юбордик. Абонентлар 180-00-00 рақами
бўйича ёки компаниянинг
расмий сайтида келтирилган
офисларга мурожаат қилишлари мумкин”.
"Ucell" ходимлари ва савдо вакиллари рейдлар ўтказиб, тўлов
шартларини бузаётганларни аниқламоқда. Агар ушбу қоидабузарлар
"Paynet" операторлари бўлиб чиқса, биз ушбу ҳолатлар ҳақида тўлов
тизими раҳбариятига расман хабар қиляпмиз. Агар қоидабузарлик "Ucell"
дилерлари томонидан содир этилган бўлса, компания жаримагача бўлган жиддий
санкцияларни қўллаяпти ва бундай ҳолатларнинг олдини олиш бўйича барча
чораларни кўряпти.
Шунингдек компания истеъмолчиларнинг ҳуқуқларини бузаётганларни аниқлаш
мақсадида давлат органлари, хусусан Давлат монополиядан чиқариш ва рақобатни
ривожлантириш қўмитаси билан ҳамкорлик қилишга ҳам тайёр. "Ucell"
абонентларни ўз ҳуқуқларини ҳимоя қилишга ва конкрет фактлар ва шундай
пунктларнинг манзилларини кўрсатган ҳолда, тўловларни қабул қилишдаги
қоидабузарлик ҳолатлари ҳақида хабар беришга чақиради.
|
