АҚШ ички хавфсизлик вазирлиги "BOSS” деб номланувчи кузатув тизимининг дала синовлари якунлангани ҳақида эълон қилди.
Ушбу биометрик-оптик кузатув тизими маҳаллий хавфсизлик хизмати ходимларига оломон орасидаги террорчини ёки қидирувдаги жиноятчини жуда тез ва юқори аниқликда таниб олиш имконини беради. Тизим Америка шаҳарларининг кўчаларига ўрнатилган ташқи кузатув камераларидаги видеоёзувлар асосида ишлайди.
Айтиш жоизки, АҚШда олдин ҳам бундай дастурлар билан тажрибалар ўтказилган. Масалан, Facebook ижтимоий тармоғи худди шундай технологияни фотосуратлар учун қўллаган. Ҳозир АҚШдаги йирик шаҳарларнинг кўпчилигида кузатув камераларининг бутун бир тармоғи ўрнатилгани ҳеч кимга сир эмас. Шунингдек, каттароқ ҳудудлар соҳиблари ўз ихтиёрига кўра ўрнатиши мумкин бўлган хусусий қурилмалар ҳам мавжуд. Улар полицияга ҳам маълумот бериб туради. Айни пайтда Нью-Йорк шаҳри АҚШдаги энг кўп "кузатиладиган” шаҳар ҳисобланади. Шаҳардаги Пастки Манхэттеннинг ўзида тўрт мингдан зиёд видеокузатув камералари ишламоқда.