"GM Uzbekistan” O‘zbekiston-AQSh qo‘shma korxonasi 2011-yilda ichki
bozorda jami 121 584 dona "Chevrolet” avtomobillarini sotdi. Bu haqda
Amerikaning "General Motors” avtokonserni xabar qilgan, deya yozadi
"UzDaily.uz” nashri.
Eslatib o‘tamiz, "GM Uzbekistan” yopiq aksiyadorlik jamiyati
2010-yilda ichki bozorda 143 000 donaga yaqin avtomobil sotgan edi.
"GM” ma’lumotlariga qaraganda, O‘zbekiston o‘tgan yil yakunlariga
ko‘ra "Chevrolet” rusumidagi avtomobillarning sotilishi bo‘yicha jahonda
birinchi o‘ntalikka kirgan. O‘zbekiston ushbu reytingda 8-o‘rinni
egallagan.
Jumladan, "Chevrolet” avtombillarining sotilishi bo‘yicha tuzilgan
ushbu reytingga AQSh (1,775 million dona), Braziliya (632 201), Xitoy
(595 068), Rossiya (173 485), Meksika (162 461), Kanada (150 540),
Argentina (133 491), Hindiston (111 056) va Kolumbiya (105 783) ham
kirgan.
Ma’lumot o‘rnida:
"UzDEUavto” yopiq aksiyadorlik jamiyati mustaqillikning ilk yillarida
O‘zbekiston hukumati va Janubiy Koreyaning "Daewoo Motors” kompaniyasi
bilan hamkorlikda ochilgan edi. 1996-yilda ilk avtomobillar – "Nexia”,
"Tico” va "Damas” modellarini ishlab chiqarish yo‘lga qo‘yilgan.
Zavodning yillik avtomobil ishlab chiqarish hajmi 250 ming donani
tashkil etadi.
2008-yilda Asakadagi avtomobil zavod asosida "GM Uzbekistan” qo‘shma
korxonasi tashkil qilingan bo‘lib, AQShning "General Motors”
korporatsiyasi zavodning 25% va bitta aksiyasiga egalik qilmoqda.
Korxonaning qolgan aksiyalari "O‘zavtosanoat” milliy
xolding-kompaniyasiga tegishli.
2008-yilning sentabr oyida "GM Uzbekistan” va "General Motors DAT”
kompaniyalari o‘rtasida "Chevrolet Spark” modelini ishlab chiqarishni
yo‘lga qo‘yish uchun zarur mashina va texnikani yetkazib berish bo‘yicha
shartnoma imzolandi. 2009-yilning yanvar oyida esa O‘zbekiston
Respublikasi Vazirlar Mahkamasi Asakadagi avtomobil zavodida ushbu
modelni ishlab chiqarishni tashkil etish to‘g‘risida qaror qabul qildi.
"Chevrolet Spark” modelini ishlab chiqarish loyihasining umumiy
qiymati 124,5 million dollarni va yillik quvvati 50 ming donaga yetadi.
| 
