Малайзиядан тўққиз медал - 5 Октября 2011

Куала-Лумпур шаҳрида енгил атлетика бўйича ўтказилган Малайзия очиқ чемпионатида муваффақиятли иштирок этган ўзбекистонлик спортчилар 6 олтин, 2 кумуш ва битта бронза медални қўлга киритиб, келаси йили Лондонда бўладиган ХХХ ёзги Олимпия ўйинларида қатнашиш ҳуқуқини берадиган муҳим рейтинг очколарига эга бўлдилар. Қитъамизнинг энг тезкор спринтерларидан ҳисобланган Гўзал Хуббиева 100 метрга югуришда барча рақибаларини ортда қолдириб, маррага биринчи келди. 400 метр масофага тўсиқлар оша югуриш баҳсларида Наталя Асановага етадиган спортчи топилмади. Хотин-қизлар ўртасида уч ҳатлаб сакраш баҳсларида тажрибали спортчимиз Анастасия Журавлёва 13 метр 76 сантиметр натижа қайд этиб, олтин медалга сазовор бўлди. Осиё ўйинлари ғолибаси Юлия Тарасова узунликка сакрашда энг юқори кўрсаткични қайд этди. Эркаклар ўртасидаги мусобақаларда юртимиз шарафини муносиб ҳимоя қилган истеъдодли ёш атлетларимиздан Руслан Қурбонов уч ҳатлаб сакрашда, Суҳроб Хўжаев эса босқон улоқтириш бўйича олтин медалга сазовор бўлди. Спортчиларимиздан Леонид Андреев узунликка сакрашда, ўсмирлар ўртасидаги жаҳон чемпионати совриндори Валерия Канатова уч ҳатлаб сакрашда кумуш медални қўлга киритган бўлса, яна бир бронза медал уч ҳатлаб сакраш баҳсларида Александра Котляровага топширилди.