Кубандаги фожиали воқеалар ва Украинада россиялик зиёратчиларнинг ҳалокатли йўл-транспорт ҳодисасига учраши муносабати билан душанба куни Россияда мотам куни деб эълон қилинди.

Шу куни бутун мамлакат ҳудудида ҳамда Россиянинг хориждаги ваколатхоналарида давлат байроқлари туширилди. Маданият муассасалари ва давлат телеканалларига кўнгилочар кўрсатувларни намойиш этмаслик тавсия этилди. Краснодар ўлкаси ҳам мотамда, бу ерда губернатор Александр Ткачёвнинг қарорига кўра мотам куни эълон қилинди. 

Шу кунларда Кубань ўз тарихидаги энг оғир ва вайронали сув тошқинини бошидан кечирмоқда. 6 июль куни сув тошқини ушбу ўлканинг бирданига учта ҳудудида юз берди – Геленжик, Новороссийск ва айниқса, Кримск. Беш мингдан зиёд уй сув остида қолиб кетди.

Фожиа қурбонларининг сони ҳам ошиб бормоқда. Охирги маълумотларга кўра, сув тошқини натижасида 171 киши ҳалок бўлган. Уларнинг кўпчилигини Кримск райони аҳолиси ташкил этади. Куни кеча ҳалок бўлганларнинг дастлабки дафн маросимлари бўлиб ўтди.

Қайд этиб ўтамиз, Кубандаги сув тошқини кучли жала ёмғирлари оқибатида юз бергна. Бироқ блогосферада сув тошқинига Кримск ёнида жойлашган Небержаев сув омборидан сув ташланиши натижасида юз берган деган тахмин илгари суриган. Россия ФВВ, Тергов қўмитаси ва "Ростехнадзор”да таъкидлашларича, сув ташланиши штатли режимда амалга оширилган ва у сув тошқинига сабабчи бўла олмаган.

Одамларнинг оммавий ҳалок бўлиши факти бўйича РФ ЖКнинг "Эҳтиётсизлик туфайли икки ва ундан ортиқ шахсларнинг нобуд бўлиши” моддаси бўйича жиноий иш қўзғатилиб, тергов олиб борилмоқда.

7 июль куни яна бир фожиа юз берди: Украинадаги "Почаевская лавра” монастирига қараб россиялик зиёратчилар билан йўлга чиққан автобус Киев-Чернигов трассасининг 119-километрида қарама-қарши ҳаракат йўлига чиққади ва ағдарилиб кетади. Дастлабки маълумотларга кўра, ҳайдовчи йў ҳаракати қоидаларини бузган. ЙТҲ натижасида 14 киши ҳалок бўлган, 29 таси жароҳатланган. Автобусда жами 43 киши бўлган.