2011 йил 23 октябрь куни соат 20.00 да пойтахтимиздаги "Ўзбекистон” халқаро форумлар саройида жаҳондаги энг машҳур бастакорлардан бири — Эннио Морриконенинг концерт дастури мухлислар эътиборига ҳавола этилади. Мусиқа устасининг Ўзбекистон миллий симфоник оркестри билан ҳамкорликдаги мазкур лойиҳаси юртимизда олтинчи маротаба ўтказилаётган Art Week Style.uz санъат ҳафталигининг энг муҳим тадбирларидан биридир. Концертга чипталарнинг ярми мамлакатимиз ёш иқтидор эгаларига бепул тарқатилади.

 Эннио Морриконе — замонамизнинг энг машҳур бастакори бўлиш билан бирга кино мусиқаси борасидаги юксак истеъдоди билан ажралиб туради. Ўзининг ярим асрлик фаолияти мобайнида у Италия, Испания, Франция, Германия, Буюк Британия, Россия ва АҚШда суратга олинган 480 дан ортиқ фильм ва телесериалларга мусиқа басталаган. Кино бастакори сифатида у жами беш маротаба "Оскар” мукофотига номзод бўлган ва кинематографияга қўшган улкан ҳиссаси учун 2007 йилда ушбу мукофотга лойиқ топилган. Бундан бир неча йил муқаддам, аниқроғи, 1992 йилда худди шу номинацияда Венециан кинофестивалининг "Олтин шер” совринини қўлга киритган эди. Бундан ташқари "Олтин глобус”, "Грэмми” ҳамда Британия киноакадемияси совринларига бир неча маротаба лойиқ топилган.

 Эннио Морриконе 1928 йилда Рим шаҳрида жаз ижрочиси оиласида туғилган. Труба, оркестр (фанфар) ва композиция йўналишлари бўйча учта диплом билан Рим консерваториясини тамомлаган. Эннио Морриконе оилали, тўрт нафар фаранди билан Рим шаҳрида истиқомат қилади. Унинг ўғли Андреа Морриконе ҳам кино учун куй басталайди. Эннио Морриконе 1961 йилдан бошлаб асосан итальянча вестерн жанридаги фильмларга мусиқа басталай бошлаган. Синфдоши, режиссёр Сержо Леоне фильмларига ишланган мусиқий асарлар унга шуҳрат олиб келди. Леоне/Морриконе — режиссёр ва баскорнинг ижодий иттифоқини Эйзенштейн - Прокофьев, Хичкок - Херрманн ҳамда Феллини - Рота сингари машҳур дуэтлар билан таққослашади. Орадан вақт ўтиб, Морриконе мусиқасига Бернардо Бертолуччи, Пьер Паоло Пазолини, Дарио Арженто сингари режиссёрлар буюртма бера бошлашди. Европада обрў қозонган Морриконени Голливуд киноматографиясига таклиф этишади. АҚШда у Роман Полански, Оливер Стоун, Брайан Де Пальма, Жон Карпентер каби кўплабмашҳур режиссёрлар фильмлари учун мусиқа басталаган.