"The New York Times” gazetasi Google internet-kompaniyasining kelajak texnologiyalari ishlab chiqiladigan maxfiy laboratoriyasi – "Google X” mavjud ekanligi haqida yozdi. Ma’lum bo‘lishicha, ushbu laboratoriyada o‘z-o‘zini boshqardigan avtomobillar, yuklarni orbitaga olib chiqish uchun "kosmik” liftlar, robot texnikasi sohasidagi ilg‘or texnologiyalar hamda Internetga ulangan muzlatgichlar mavjud, deb yozadi gazeta. Biroq, ushbu laboratoriyaning aynan qayerda joylashganligi oshkor qilinmagan.

Gazetaning yozishicha, "Google X” loyihalari ustida sun’iy intellekt va robot texnikasi bo‘yicha mutaxassislar, "Xbox 360” o‘yin konsoli uchun mo‘ljallangan "Kinect” kontrollerini ishlab chiquvchilar va boshqalar ishlaydi.

Qiziq tomoni, kompaniyaning ko‘pchilik xodimlari ham ushbu maxfiy laboratoriyaning mavjud ekanligini bilishmas ekan. Loyihada Google kompaniyasidan tashqari Microsoft, Nokia kompaniyalari mutaxassislari, Stenford universiteti va Massachusets texnologiya instituti xodimlari ham faoliyat ko‘rsatishadi.