2011-yil yakunlariga ko‘ra "Nokia” kompaniyasining jahon mobil
telefonlar bozoridagi ulushi yana 8 foizga qisqargan bo‘lsa-da, u hamon
umumiy hisobda yetakchilikni o‘z qo‘lida saqlab turibdi. Biroq,
smartfonlar bozoriga keladigan bo‘lsak, bu borada Janubiy Koreyaning
"Samsung” kompaniyasi birinchilikni "Nokia”dan tortib oldi.
Shunday qilib, "Strategy Analytics” tadqiqot
kompaniyasining hisob-kitoblariga ko‘ra 2011-yilda butun dunyo bo‘ylab
jami 1,55 milliard dona mobil telefon sotilgan. 2010-yilda esa mobil
telefonlarning savdosi 1,36 milliard donani tashkil qilgan edi.
Natijada, bu borada yillik o‘sish 14,1 foizdan iborat bo‘ldi. Bunda,
mobil telefon deyilganda ham oddiy telefonlar, ham smartfonlar nazarda
tutilmoqda.
O‘tgan yili Finlandiyaning "Nokia” kompaniyasi butun
dunyo bo‘ylab jami 417,1 million dona mobil telefon sotib, jahon
bozorida 26,9 foiz ulushga ega bo‘ldi. Taqqoslaydigan bo‘lsak, "Nokia”
2010-yilda jahon bozorining 33,3 foiziga egalik qilar edi.
Ro‘yxatning ikkinchi pog‘onasini "Samsung Group” kompaniyalari
guruhiga kiruvchi "Samsung Electronics” band qilib, u
iste’molchilarga 2011-yilda 327,4 million dona telefon yetkazib berdi.
Uning jahon bozoridagi ulushi esa 21,1 foizga yetdi.
Kuchli uchlikni AQShning "Apple” kompaniyasi yopib
berdi. U 2011-yilda o‘zining "iPhone” smartfonlari savdosini deyarli
ikki barobarga oshirib (96 foiz o‘sish), uning miqdorini 47,5 million
donadan 93 million donagacha yetkazdi. Kompaniya faqatgina "iPhone”
smartfonlarini ishlab chiqarsa-da, u jahon bozorida o‘tgan yili 6 foiz
ulushga ega bo‘ldi. U birgina 2011-yilning to‘rtinchi choragida jami 37
million dona smartfon sotishga muvaffaq bo‘ldi. Buni ko‘proq oktabr
oyida sotuvga chiqarilgan "iPhone 4S” smartfonining muvaffaqiyati bilan
bog‘lash mumkin.
2011-yilda butun dunyo bo‘ylab sotilgan barcha telefonlardan 488,5
million donasini yoki 31,5 foizini smartfonlar tashkil qildi. 2010-yil
bilan taqqoslaydigan bo‘lsak, o‘tgan yili jahonda smartfonlar savdosi 63
foizga o‘sgan. Chunki, 2010-yilda jami 299,5 million dona smartfon
sotilgan bo‘lib, bu miqdor jami telefonlarning 22 foizini tashkil qilgan
edi.
Jahon mobil telefonlar bozorining yuqori sur’atlarda o‘sib kelayotgan
segmenti – smartfonlar bozoriga to‘xtaladigan bo‘lsak, 2011-yil
yakunlariga ko‘ra "Samsung” – jahonning birinchi raqamli smartfon ishlab
chiqaruvchi kompaniyasi bo‘ldi. "Samsung” 2010-yilda atigi 23,9 million
dona smartfon sotib, jahon smartfonlar bozorining 8 foiziga egalik
qilgan bo‘lsa, u 2011-yilda sotuv hajmini deyarli 4 barobar oshirib (308
foiz o‘sish), 97,4 million dona smartfon realizatsiya qildi va jahon
smartfonlar bozorida 19,9 foiz ulush bilan mutlaq yetakchiga aylandi.
Yuqorida "Apple” kompaniyasining faqat smartfonlar ishlab chiqarishi
haqida to‘xtalgan edik. Shu boisdan, "Apple” 2011-yilda jami 93 million
dona "iPhone” smartfonlarini sotib, jahon smartfonlar bozorida 19 foiz
ulush bilan ikkinchi o‘rinda turibdi.
"Samsung”ning diversifikatsiya siyosati hamda turli modeldagi
smartfonlarni seriyali ishlab chiqarib, bozorga chiqarishi unga
smartfonlar bozori tizginini o‘z qo‘liga olishiga katta yordam berdi.
Shu paytgacha, ham umumiy mobil telefonlar bozorida, ham smartfonlar
bozirda mutlaq hokim bo‘lib kelayotgan "Nokia”ning bir "ustuni” quladi,
desak mubolag‘a bo‘lmaydi. Chunki u 2011-yilda smartfonlar bozoridagi
yetakchiligini "Samsung”ga ikki qo‘llab topshirishga majbur bo‘ldi.
Ekspertlarning fikricha, "Samsung” 2012-yil yakuniga kelib, umumiy mobil
telefonlar bozorida ham birinchilikni "Nokia”dan tortib olishi mumkin.
Shu o‘rinda, kuchli uchlikka kirmaydigan kompaniyalar haqida ham
ba’zi fikrlarni aytib o‘tish joiz. Yuqoridagi jadvallardagi boshqa
kompaniyalar sirasiga kiruvchi "LG”, "HTC”, "Motorola Mobility”, "Sony”,
"BlackBerry”, "Huawei” va "ZTE” kabilar 2010-yilda jami 579,3 million
dona mobil telefon sotib, jahon bozorida 42,6 foiz ulushga egalik
qilishgan bo‘lsa, 2011-yilda esa ular umumiy hisobda 713,9 million dona
telefon realizatsiya qilib, jahon bozorining 46 foiziga ega chiqishdi.
Xususan, smartfonlar bozorida ham ushbu kompaniyalar o‘z o‘rnini
mustahkamlab kelishmoqda. Masalan, ular 2010-yilda jami 128 million dona
smartfon sotishgan bo‘lsa (42,7 foiz ulush), 2011-yilda bu miqdor 220,8
million donagacha yetdi (45,2 foiz).
So‘nggi yillarda "Google” internet-giganti tomonidan ishlab chiqilgan
Android mobil operatsion tizimining foydalanuvchilar orasidagi
ommaviyligi oshib borishi hamda "Apple” kompaniyasining "iOS” mobil
platformasini o‘zining innovatsion texnologiyalari bilan boyitishi
evaziga odamlar oddiy, ya’ni "aqlli bo‘lmagan” telefon sotib olishdan
ko‘ra, ko‘p funksiyali, sensor ekranli smartfon sotib olishni afzal
ko‘rmoqda. Xo‘sh, sizchi? Siz o‘zingiz uchun qanday telefonni afzal
ko‘rasiz?
|