Angliyaning "Manchester Yunayted” futbol klubi o‘zining ijtimoiy tarmog‘ini ishga tushirmoqchi. Bu haqda Britaniyaning "Marketing” haftalik jurnali xabar qilgan.

Yangi loyihaning auditoriyasi, klub tomonidan avval hisoblanganidek, 350 million muxlisdan oshib ketishi mumkin. Klub keyinchalik o‘zining taxminlarini 500 million foydalanuvchigacha ko‘targanidan so‘ng, "TNS Global” tadqiqot agentligi yangi ijtimoiy tarmoqning foydalanuvchilari soni 660 million kishigacha yetishini prognoz qildi. Taqqoslaydigan bo‘lsak, hozirda "Facebook” ijtimoiy tarmog‘ining foydalanuvchilari soni 800 milliondan oshib ketgan.

Angliya premyer ligasining g‘olibi bu borada o‘zining marketing strategiyalarini ishlab chiquvchi "SapientNitro” reklama agentligiga murojaat qilgan. Taxminlarga ko‘ra, klubning ijtimoiy tarmoq sayti kelasi ikki yil ichida ishga tushishi kutilmoqda. Klub hozirda "Facebook”da o‘zining sahifasiga ega, unga shu kungacha 20,2 million foydalanuvchi obuna bo‘lgan.

Yangi ijtimoiy tarmoqning foydalanuvchilari klubning ekskluziv videolarini, shu jumladan "MUTV” telekanalini tomosha qilish imkoniyatiga ega bo‘ladilar. "Manchester Yunayted” ushbu loyihaga boshqa homiylarni ham jalb qilishni rejalashtirmoqda.

Eslatib o‘tamiz, shu yilning bahorida "Forbes” jurnali dunyodagi eng qimmat futbol klublari reytingini e’lon qilgan edi. Unda "Manchester Yunayted” klubining qiymati 1,835 milliard dollar qiymatida baholangan va u reytingning eng yuqori o‘rnini band qilgan.