 Украина пойтахти Киев шаҳрида жойлашган
«НСК Олимпийский» стадионида Испания ҳамда Италия терма жамоалари
ўртасидаги Европа чемпионати финал учрашуви ўз ниҳоясига етди. Унда
Испания терма жамоаси ғалаба қозониб, тўрт йил ичида Жаҳон ва Европа
чемпионатларида кетма-кет ғалаба қозонган ягона жамоа сифатида тарихдан
жой олди.
Испанлар ўз одатларига кўра тўпни
назорат қилиш орқали, ҳужум уюштиришга ҳаракат қилишди. Ва бу иш ҳар
доимгидек уларга натижа келтира бошлади. Тўпсиз қолган Италия терма
жамоаси футболчилари рақибга ортиқча қаршилик қила олишмади. Испания эса
аввалги ўйинлардан фарқли равишда тўпни шунчаки назорат қилиб
қолмасдан, рақиб дарвозаси олдида ўткир вазиятлар содир эта бошлашди.
Ана шундай хатти-ҳаракатлар натижасида
Давид Сильва 14-дақиқадаёқ ҳисобни очди. Иньестанинг кечсиб ўтувчи
пасини эгаллаб олган Фабрегас Буффон дарвозаси олдига яқинлашиб, тўпни
Сильвага кўтариб берди. "Манчестер Сити” аъзоси эса боши билан зарба
йўллаб ҳисобни очди. Голдан сўнг италиялик футболчилар ҳимояда ҳушёрроқ
ҳаракат қила бошлашди.
Шу билан бирга улар ҳужумни ҳам
унутмаган ҳолда, ҳисобни тенглаштиришга интилиб, олдинга ўта бошлашди.
Испания эса айнан шуни кутиб турганди. Қарши ҳужумда тўпни эгаллаб олган
испанлар майдон марказида Хавини излаб топиб, тўпни унга етказишди.
"Паслар қироли” эса биргина паси билан тўртта Италия терма жамоаси
футболчисини ожиз қолдириб, Хорди Альбани Буффон билан бирга-бир
вазиятга чиқариб юборди. Яқиндагина "Барселона” аъзосига айланган Альба
Буффон билан ўзаро дуэлда ғолиб чиқиб, тўпни дарвозага йўллади. Ҳисоб
2:0га етгач, испанлар хотиржам ҳолда биринчи бўлимни ўз якунига етказиб
қўйишди.
Иккинчи бўлимда Италия вазиятни ўнглаш
учун қўлидан келганча ҳаракат қилди. Кассано ўрнига майдонга чиққан
Антонио Ди Наталеда бир қатор қулай вазиятлар юзага келди. Аммо у бу
вазиятлардан унумли фойдалана олмади. Нафақат у, балки Италия терма
жамоасининг аъзолари ҳам юзага келган кам сонли вазиятларни ҳақиқий
голли вазиятга айлантира олишмади. Бунинг устига Монтоливо ўрнига
иккинчи бўлимда майдонга тушган Тиаго Мотта кутилмаганда жароҳат олиб
майдонни тарк этди.
Италия терма жамоасида футболчи
алмаштириш имконияти қолмагани учун, Пранделли шогирдлари ўйин охиригача
майдонда битта кам бўлиб ҳаракат қилишга мажбур бўлишди.
Ўйин якунланишига яқин майдонга тушган
Торрес 2008 йил Европа чемпионатида амалга оширган ишини такрорлаб,
Европа чемпионатининг иккита финалида гол урган тарихдаги иккинчи
футболчига айланди. Бир оздан сўнг эса Торреснинг ўзи Иньеста ўрнига
майдонга тушган Матага голли узатма ошириб, ҳисобни финалга ярашмаган
йирик кўринишга олиб келишга ҳисса қўшди.
Шу тариқа Испания терма жамоаси ҳозирда унга Европада тенг келадиган жамоа йўқлигини исботлай олди. Нафақат Европада...
La Furia Roja Campeona de Europa! "Қизил Фурия” – Европа чемпиони!
ЕВРО-2012. ФИНАЛ
"Қизил Фурия” – "Скуадро Адзурра” — 4:0
Голлар: Сильва (14), Альба (41), Ф. Торрес (84), Мата (88).
Испания: Касильяс, Арбелоа, Пике, Рамос, Альба, Бускетс, Хави, Алонсо, Фабрегас (Торрес, 75), Сильва (Педро, 59), Иньеста (Мата, 87).
Италия:
Буффон, Абате, Бардзальи, Бонуччи, Кьеллини (Бальдзаретти, 21), Пирло,
Маркизио, Монтоливо (Т. Мотта, 57), Де Росси, Балотелли, Кассано (Ди
Натале, 46).
Огоҳлантиришлар: Пике (25), Бардзальи (45).
1 июль, «НСК Олимпийский» стадиони.
|
