Тошкент халқаро Замонавий кинофестивали ўз ишини "Олтин гепард” Тошкент Халқаро кинофоруми номи билан давом эттиряпти...Кинофорум танлови учун элликка яқин фильм танлаб олинди. Танлов учта — тўлиқ метражли, анимацион ва қисқа метражли фильмлар йўналишлари бўйича ўтказилади. Танлов намойишидан ташқари, қирқдан зиёд ўзбек хужжатли фильмлари ҳамда кейинги йилларда суратга олинган энг сара тижорат кинокартиналари ҳам намойиш этилади. Ундан ташқари, ўзбек киносининг дурдона асарлари ретроспектив дастурларда намойиш этилади. Ўзбек фильмларининг ретроспектив намойишида биринчи овозсиз фильмлардан тортиб то шу кунгача яратилган мумтоз фильмларгача саралаб олинди. Кинофорумда иштирок этиш учун машҳур Болливуд кино юлдузи Саиф Алихон ҳамда "Кумуш” сериали бош қаҳрамони Сўнгул Ўденга таклифнома жўнатилди.Танловга тавсия этилган фильмларнинг географик кўлами ниҳоятда кенг. Тўлиқ метражли бадиий фильмлар танловида 12 та бадиий фильм, 15 тадан анимацион ва қисқа метражли бадиий фильмлар иштирок этади. Танловга ўзбек фильмлари ҳам танлаб олинди. Унга даъвогар кинокартиналар ичида анимацион фильмлар йўналишида "Оқ товуқ» ва «Букри ошиқ» фильмлари, қисқа метражли фильмлар йўналишида ёш кинорежиссёр Умид Ҳамдамовнинг "Назар” фильми ҳам бор. Бадиий фильмлардан бир нечтаси, жумладан, Зулфиқор Мусоқовнинг "Қўрғошин”, Ёлқин Тўйчиевнинг "Илова” фильмлари танловда иштирок этишга даъвогар. Айни пайтда Тошкент кинотеатрларида кинофорум дастурларини намойиш этиш учун тайёргарлик кетяпти.
