Kinoteatrlarimiz
premeralarga boy bo’layotgani sabab biz va’da qilganimizdek birin-ketin
ekranlarga chiqayotgan filmlarning tahlilini sizga havola etishga
kirishamiz. Demak, ilk e’tiborimiz ayni kunlarda teleekranlar orqali
reklama qilinayotgan va kino saroylarida namoyish etilayotgan
"Yolg’izginam” filmiga qaratiladi. Ochig’i, bu filmning ilk jalb
qiladigan xususiyati Alisher Uzoqovning dramatik obrazda namoyon
bo’lganidir. Demak, boshladik...
Yutuq
1. Ochig’i,
Otabek Mirzaxolov ssenariysi va rejissyorligida suratga olingan filmning
erish tuyuladigan jihatlarsiz suratga olinishini hali kutmagandik.
Ammo... Keling, endi barchasini boshidan so’zlab beramiz. Birinchi yutuq
bu dunyoda tabaqalar orasida sarson baxtning qayerdan
qo’nim topishi. Ya’niki, boy bo’ladimi, kambag’almi, o’rtaxolmi baxt
baribir sevgida ekanligi aks etgan. To’g’ri, buni hind filmlari orqali
ko’p ko’rganmiz, deyishingiz mumkin. Lekin "Yolg’izginam”dagi talqin
boshqacha.
2. Aktyorlar
ansambliga keladigan bo’lsak, asosan Alisher Uzoqov, Adiz Rajabov,
Nigora Ismoilova, Otabek Musayev, Baxtiyor Karimov, Xosiyat Husanova,
Muyassar Berdiqulova kabi mashhurlardan iborat jamoada hamma o’ziga
tegishli vazifani mahorat bilan uddalagan. Ayniqsa, Alisher Uzoqov
jiddiy qiyofada ham yana bitta "pichoqqa ilinadigan”roq rolni ijro
etgani tomoshabinga seziladi.
3. Nigora
Ismoilovaga ham jiddiy rolni ishonib topshirishgani kutilmagan yangilik.
Negaki, uni bunaqa xarakterli obrazlarda ko’rishning o’zi sal
tasavvurga sig’masdi. Lekin maromiga yetkaza olgani bois fikrlarni
o’zgartirishda davom etyapti. Eng muhimi bu filmga uning prodyuseri
bosh-qosh bo’lgani va bunda Nigoraning ham yaxshigina reklamasi
o’ylanganligi sezilmaydi.
4. Adiz
Rajabov garchi salbiy obrazlarda chiqmayman, deganiga qaramay,
"Yolg’izginam”da yana uni "yomon ko’rib qolishlariga imkoniyat
yaratgan”.
5. Filmdagi
yana bir e’tiborni jalb etadigan obraz bu Nigoraning qaynotasi.
Ikkiyuzlamachi insonning xarakteri va uning voqealar rivojidagi o’rni
me’yorida tasvirlangan.
Kamchilik
1. Nigora
ijrosidagi kelinning qaynonasini kuzatar chog’idagi etigi "zamok”ini
uzib yuborish sahnasi ham ataylab qilinganga o’xshab sezilib qolgan.
Negaki, etikni kiydirish paytida qaynonasi unga "ehtiyot bo’ling” deya
tanbeh ham berib qo’yadi.
2. Farzandidan
ajralgan kelinning tug’uruqxonadan chiqishi va shu yerda birinchi
turmushi buzilgan sevgilisi bilan uchrashish sahnasi cho’zilib ketgan.
O’sha hind filmlari kabi zinalar va oyoqlar...
3. Adiz
Rajabov talqinidagi kuyovning mast holatiga ishonish sal qiyinroq
bo’ladi. Uning obrazga kirishgani sezilib qolgan.
4.
Nazarimizda, Otabek Musayev endi boshqa ampluadagi obrazlarni ijro
etishi kerak. Negaki, so’nggi o’ynagan ota obrazlarida u bir xil qiyofa
aks etib qolyapti.
5. Garchi
muvaffaqiyatli chiqqan bo’lsa-da, siyqasi chiqqan mavzuga
yondoshilganligi kishini biroz zeriktirish mumkin.
Eslatma
Alisher
Uzoqov va Nigora Ismoilova bundan oldin "O’xshatmasni uchratmas”, "Oling
quda, bering quda” filmlarida juftlik sifatida namoyon bo’lishgan.
Yakuniy fikr
Xulosa sifatida shuni aytish kerakki, Otabek
Mirzaxolovning bu navbatdagi ishi tahsinlarga sazovor. Axir "Quvnoqlar
va zukkolar” jamoasidan kino olamiga kirib kelib, komediyasifatu ammo
erish tuyuladigan obrazlar bilan biroz tanilib keyin rejissuraga qo’l
urishining o’zi katta gap bo’lgan bo’lsa, endilikda uning maqsadi jiddiy
filmlar suratga olish ekanligi ham maqtovga sazovor. Filmga keladigan
bo’lsak, tomosha qiladigan kartina sifatida uni qarshilashimiz mumkin.
Eng muhimi, bachkana jihatlardan xoli. Shu tomonidan so’nggi paytlarda
kinoda hatto yoshlarning ham "kassa”ni o’ylamasdan KINO qilishga
urinishayotganini e’tirof etish kerak. Har xolda yo tanqidlar ta’sir
qilyapti yoki yuragida kinoga nisbatan kuchli ishtiyoqi borlar kameralar
qarshisiga kelishyapti. Nima bo’lganda ham "Yolg’izginam” ijodiy
jamoasini tabriklab qolamiz.
Baxtiyor Rasulov
| 
