Google o‘zining servislarini yopishda davom etyapti. Bu safar asosiy yopilayotgan servis — "Google Knol”, onlayn ensiklopediya servisi. Vikipediya raqobatchisi sifatida 2008-yilda ishga tushirilgan "Knol” o‘zida faqat mualliflik maqolalarini saqlash va mualliflar maqolalarida ko‘rsatiladigan reklamalardan foyda olish imkoniyatini berar edi.

"Knol”dagi har bir maqola bitta muallif tomonidan yozilishi mumkin edi, odatda, maqolada gap ketadigan sohaning mutaxassisi tomonidan. Boshqa foydalanuvchilar faqat muallif ruxsati bilangina uni tahrirlay oladi. Vikipediyadan farqli ravishda, "Knol”dagi maqolalarda Google kompaniyasining "AdSense” reklama servisi orqali reklamalar ko‘rsatilishi va undan foyda olishlari mumkin edi.

Servis 2012-yil may oyigacha to‘liq rejimda ishlaydi. Keyingi 5 oy davomida foydalanuvchilar maqolalarni o‘qiy olishmaydi, lekin mualliflar uchun maqolalarning nusxasini saqlab olish imkoniyati beriladi. 2012-yil 1-oktabrda esa, servis to‘liq yopiladi.

Boshqa yopilayotgan servis/imkoniyatlar:

Google Bookmarks Lists — "Google Bookmarks” servisida turli ro‘yxatlar yaratish. Ushbu ro‘yxatlarni ochiq yoki yopiq qilish, bir necha kishi yuritishi kabi imkoniyatlar berardi.

Google Friend Connect — saytlarga turli ijtimoiy imkoniyatlar qo‘shish. 2012-yil 1-martda yopiladi. Google kompaniyasining rasmiy blogida, Google+ ijtimoiy tarmog‘ida sahifa ochish va tarmoqning vidjetlaridan foydalanish tavsiya qilinadi.

Google Gears — shu yilning 1-dekabridan to‘xtatiladi. Servislarning offlayn ishlashiga yordam beradigan brauzer uchun kengaytma edi.

Google Search Timeline — qidiruv natijalarining soni turli yillar davomida qanday o‘zgarganini ko‘rish va filtrlash imkoniyatini berardi.

Google Wave — kommunikatsiya uchun universal servis vazifasini o‘tashi lozim bo‘lgan servis (pochta, chat, forum, viki va hokazolarni birlashtira oladigan).  2012-yil 31-yanvardan faqat o‘qish rejimiga o‘tadi (yangi kontent yaratib bo‘lmaydi), 30-apreldan esa to‘liq yopiladi.