Келаси йил ёзида "General Motors” компанияси илк бор АҚШда универсал автомобилларни ишлаб чиқаришни бошлайди. 

Ушбу машиналарда қўшимча ускуналарни ўрнатмасдан туриб ҳам икки хил ёнилғидан фойдаланиш мумкин бўлади. 

"GM” компанияси директорлар кенгашининг раиси ва бош ижрочи директор Дэн Акерсон ОПЕК нефть эмбаргосининг 40 йиллиги шарафига Вашингтонда ўтказилган энергетика саммитида янги иккита ёнилғида ишлайдиган "Chevrolet Impala” автомобилини тақдим этди. Унинг сўзларига кўра, мавжуд моделлар асосида яратилган янги автомобиллар ёнилғи учун бирданига иккита бак билан жиҳозланади. Уларнинг биттаси бензин учун, иккинчиси эса суюлтирилган табиий газ учун мўлжалланган. Акерсоннинг қайд этишича, ёнилғига тўлдирилган автомобилнинг ҳаракатланиш масофаси қарийб 800 км ни ташкил этади.