...Биринчи қатордан шундоқ орқага разм солсангиз, 4200 та бошга кўзингиз тушади, айрим ўриндиқларда иккитадан, ёш болажонларни, чақалоқларни ушлаб олганларни ҳам назарда тутганда бу ҳисса яна ортади. Ёнимизда иккитагина бўш жой бор эди, биронтасининг қўлига текин чипта, таклифнома тушган бўлса, келмай қолгандир деган ўйда эдик. Йўқ, ҳаллослаганча, пешона терини арта-арта икки ёши улуғ опа-сингиллар жойлашиб олди. "Бир ойдан бери шу концертни орзиқиб кутамиз, айлоной. Ахир, 30 кун олдин Зоминдан келиб чипта харид қилиб кетганмиз, мана зўрға етиб келдик” дея фикрини билдиргандек бўлган бу опа шу бўйи концерт охиригича, кўзларига ишонқирамай ўтирди: Наҳот, саҳнада куйлаётган Озодбек! Дардли қўшиқ айтса йиғлади, шўхига вазни ҳалақит берса-да амаллаб ўйнади ҳам, ҳатто хонанданинг отаси иккинчи қаторда ўтирганидан хабар топиб, отахонни рақсга ҳам чорлади...Хуллас, каромат борини кўрсатди! Бу биз гувоҳ бўлган кичик бир воқеа эди. Мухлислар билан боғлиқ бундай антиқа воқеалар концерт давомида саноқсиз бўлганига ишонаман. Парда очилиши билан баҳашам саҳнадан кўз қувнади. Бутун саҳна олдию орқаси экран билан қопланган! Ҳатто саҳна тепасида миллий руҳиятни сақлаб қолиш учун пиёлага ўхшаш декорация ҳам қўндирилган. Ҳаммаси ажойиб! Қарсақли мусиқа садолари остида интиқ кутилган, дийдори одамларга жуда яқин хонанда пайдо бўлди. "Хуш келдингиз” дея куйлаб, таъзимда барча мухлисларини қабул қилди. Кириш сўзида соч толасидан оёқ бармоқларигача титроқда турганини, мухлислар қўллаб-қувватлаши унга далда бўлишини таъкидлади.

Концерт давомида куйланган "Бир, икки, уч”, "Онам руҳи”, "Севги " каби тароналарни мухлислар катта ҳайрат билан қарши олган бўлса, мегахит "Кутаман”нинг ремикси ва "Хоразмча” қўшиқ қўлларни рақсдан чарчатди-ёв!

Хонанданинг қўшиқларидан кейинги хулосавий гаплари томошабинларни сеҳрлаб қўйди. Энг қизиғи, мухлислар хонанданинг нигоҳини, кўз ўқи қаёққа қараганини илғаб, росманасига рашк қилиб, балконнинг чап томонидан қичқирди: "Бизга ҳам қараб гапиринг, Озодбек”. Кичик ҳазил эътиборсиз қолмади. Саҳнадаги юлдуз нафақат нигоҳи балки меҳр нури билан у томонларни ҳам чақнатди. Бу даргоҳдан ҳеч ким норизо бўлиб кетмасин, деган ўйини исботлаганига қойил қолдик. Бу йил ҳам яна бир шогирдини кенг оммага тақдим этди. У ажойиб дастурда "Ажойибсан-да” дея куйлади.  

Концерт кулгусиз қизимаслиги аниқ. Бироқ, қизиганни қайнатишнинг янги йўлини ўйлаб топган режиссёр Саъдулла Абдуллаев ишончни оқлади. У кашф этган "тақлидчилар” гуруҳи, шундоққина кўз олдимизда кўплаб машҳурларнинг 2050-йилдаги ҳолатини тасвирлади-қўйди! Мана сизга, футурология (келажакка башорат)!  Қойил қолмасликнинг асло иложи йўқ. Экранда қариган Озодбекнинг йиллар сарҳисобидаги қиёфаларига мос равишда маълумотлар берилди:  2025 йил 91 кун, 2050 йил яъни, 76 ёшида 245 кун икки маҳалдан мухлисларини хурсанд қилади...Оригинал кулгу! 63 га чиққан Позилжонов, Абдулла Қурбонов қарилигида "Оталар сўзи-ақлнинг кўзи”да бошловчилик қилиши, Ғиёс Бойтоевнинг 50 йилдан бери мўйлови орқасидан кун кўриши ҳақидаги ичакузди ҳазиллар кўзлардан ҳатто ёш чиқариб юборди. Райҳон момонинг  Назарбековнинг "Мажнунтолнинг новдаларини” ўз лаҳжасида куйлагани шу қадар ишонарли чиқдики, Райҳоннинг ўзи келибди, деганлар ҳам топилди.

Хонанданинг "Ёрим аразлаб кетди” қўшиғига Паризоданинг эврилиб рақсга тушиши эса кўнгилларни хушнуд этди. Ахир, севимли раққосани оилали бўлгандан бери саҳнага қайтишини соғиниб қолгандик. Муҳриддин Холиқовнинг "Йиғлама қиз”и "саҳна қироли"га айланган шогирди ижросида жонли  куйлангани, устознинг руҳини чинакамига шод қилган бўлса, не ажаб?

"Дадажон”. Оила - жамият асоси. Унинг мустаҳкамлигини таъминлайдиган жавобгар ота-она фарзандига нималар дейиши керак? Бу қўшиқ яхшигина жавоб бўла олди! Навоийсини, Бухорийини билмаган фарзанд буюк аждодларимиз, буюк миллатга муносиб авлод бўла оладими? Озодбекнинг униб келаётган болажонлар тарбиясига ҳам масъул эканини унутмагани эътиборга молик. Ахир, бугун унинг концертига ота-онаси қўли билан етаклаб келаётган болалари шу кўрганларидан кези келиб андоза олади. Ўтмиш ва келажак ўртасида бугундан кўприк ясаш учун ҳофизнинг ўзи комил бўлмоғи керак. Бу борада, ишонамиз, Назарбековга!

Шундан сўнг, "Онаси борларга ҳавас қиламиз, онаси йўқлар, келинглар, бир дардлашамиз” дея "Она руҳи” дардли хонишини куйлади. Томошабинлар ҳолатини ўзингиз тасаввур қилаверинг!

"Хафа бўламан” қўшиғига эса кўринишидан ёшлигига қайтган Ўзбекистон халқ артисти Рушана Султонова залдан саҳнага кўтарилиб, имправизицион равишда ял-ял рақс улашди.

Шундай қилиб, дастурнинг кульминацион, таъбир жоиз бўлса, глобал нуқтасига етиб келдик! Озодбек зални тўлдириб турган қоракўзларга ҳақли равишда қўшиғи орқали савол ташлади: "Бундан ортиқ яна нима керак бизга?”.  Бугун арзимас ташвишлардан нолийдиган, пашшадан фил ясайдиган фуқаролар ҳам орамизда топилади. Қўшиқ ва унга мос тарзда яратилган видеолавҳалар этни жунжиктиради. Талмовсираган, турли-туман офату таҳдидлар қуршовида қолган дунёга бир назар ташласак, қандай замон ва маконда эмин-эркин яшаётганимизни яна бир бор эсга олиш фурсатига ошно тутинасиз ва бехосдан, "Шукур, Яратганга шукур" деб юборасиз. Хонанда масъулиятни аъло даражада уддалади. Халқ ҳофизи сифатида елкасида турган вазифани адо этди.

Концерт финалини шукроналикка йўғрилган шўх тарона билан якунлар экан, бир йил давомида нималар демоқчи эканини хулоса тарзида баён этди, куйчи. Буни қай даражада уддалади, мухлисларнинг ўз шахсий таҳлилларида! Муҳими, у ўзбек санъати тарихи саҳифаларига маънавий бой концерт тушунчасини муҳрлай олди. Аслида концерт мўмай даромад орттириш манбаи эмас! Маданий ҳордиқ доирасида тафаккур гулшанига ўз ҳиссасини қўшмоқлик мақсади эканлигини бошқа хонандаларга ҳам ўрнак сифатида дарс қила олгани учун "Хуш келдингиз” дея қарши олган, юзлаб меҳнатини, куч-ғайратини сафарбар қилганларга тасаннолар йиғиндиси ёғилганини айтгимиз келди!

Хулоса.

ДИД.ЯХШИ ҚЎШИҚ.ФАЙЗ! Концертни концерт даражасида ушлайдиган шу уч омилни  бирлаштира олган, улар учрашган чорраҳа марказида эса яна ўша Назарбеков!  Ғалаба, янги ғалаба муборак, ўзбек санъати ифтихори! Рекорд сари йўл очганингиз рост бўлсин, Бек!

Jasur HAMROYEV